إززززز - هيثم دبور

....

أن تبيد هذه أبداً

بقلم هيثم دبور ٢٤/ ٢/ ٢٠١١
مسجون فى منفاك البعيد

عمال تصاحب وحدتك

ومفيش وشوش غير فى المراية سحنتك

وحظك اليوم فى الجرايد مش سعيد

باب السودوكو ليه ممل

أرقامه بتشبّه على أرقام حسابك فى البنوك

واللى جمعته فى ثانية راح

ذكرى حزينة تفكرك بكلمة للمرحوم أبوك

إن الضنا بيملى قلبك بالحياة

وأنت النفس فارق ضناك

وحتى سطوة نظرتك

ساعة ما تؤمر فى البشر

ملايين من الخلق النهارده رافضة بكلامك تؤتمر

إيه اللى فاضل وانت قاعد ع البلاچ

والشمس غاربة زى شمسك بالتمام

تقعد تفتش فى التاريخ

واحنا بنعلن كل دى الأيام

الناس بتحصد زرعها

وانت بذرت فى أرض بور

فى ناس بتستطعم شخيرها م الشقا

اوصف لى من بعد الغروب

بتحط راسك ع المخدة ازاى بقى؟

.....

.....

العواجيز اللى جوانا

تبص فى مرايتك مفيش شعرة بيضا

وقاتلك شعورك بإنك عجوز

وتسأل كبرنا

أقولك يجوز

فى ساعة ما نسمع غنا التسعينات

أو الإعلانات

وتتر الدراما فى مسلسل كئيب

وخوفنا أما نخرج تشوفنا العيون

وقصر البارون

ودلوقت خوفنا بقى شىء غريب

فى لون الشوارع وطعم الغرام

وصوت الترام

ساعة لما نجرى وراه خطوتين

وشلة مرافقها لكشك السجاير

قوام بنت فاير

ووقت أما نضحك أوى م الحنين