أجمل ما كتب الشاعر أحمد فؤاد نجم

طبعا الشاعر أحمد فؤاد نجم غنى عن التعريف
وأكيد كلنا سمعنا عنه او قراينا قصايده
اناجايب النهارده كام قصيده له يارب تعجبكم
واللى عارف قصيده ينزلها التوبك مفتوح لقصايد الشاعر

أحدث ما كتب الشاعر أحمد فؤاد نجم

قصيدة : راجل ابن راجل






الجحش قال للحمار *** يابا اديني الحنطور


ياباإنت سنّك كبر *** و وَجَب عليّا الدور


كَـحّ الحمار كَـحة *** فزعِت لها الركاب


مش يابني بالصحة *** ده كل شئ بحساب


و سواقة الحنطور *** محتاجة حدّ حكيم


و إنت عينيك فارغة *** همّك على البرسيم


قوللي تسوق إزاي *** و التبن مالي عينيك


ده حتى حبل اللجام *** واسع يا إبني عليك


إعقل و بطّل طمع *** لا تسخّن الركاب


ماتجيش يا واد جنبهم *** لا تبقى ليلة هباب


دول صنف ناس جبّار *** قادر مالوهش أمان


يبان عليهم وَهَن *** لكنهم فرسان



يابا دا نومهم تِقِل *** و بقالُه يابا سنين


كل البشر صحصحوا *** و لسه دول نايمين


يا جحش بطّل هبل *** و بلاش تعيش مغرور


رُكابنا مش أغبيا *** ولا عضمهم مكسور



بُكرة حيصحولك *** و يزلزلوا الحنطور


و تلاقي في قفاك *** تمانين خازوق محشور

هو ده لنجم بجد؟؟

اه والله اخر قصيده
بس تحفه يارب تكون فهمت قصده بجد

ما انا لو مش فاهم مكنتش سألت..
انا شوفتها ع الفيس قريب

اه فعلا ظهرت عالفيس
بس عجبانى اوى
فكرتها بسيطه ومفهومه بس للى يركز

خدت بالك انت من تمانين خزوق دى

الملافظ سعد

حلو أوى (و كل لبيب بالاشارة يفهموا)

اخر قصيده فى التوبك كانت لاحمد فؤاد نجم بعد انتخابات مجلس الشعب

ويارب يكون الجحش فهم معنى الكلام وعرف الخزوق وعرف صحوه التمانين مليون

لما قصيده زى دى تتكتب قبل الثوره بشهرين
يبقى الناس دى فاهمه المصرى صح
وعارفه انه ممكن يعمل المستحيل
وقادر انه يعدى المحنه دى
ويوصل بالبلد لبر الامان

لك الله يابلدى