أدخل برجلك اليمين ... وعرفنا بيك هنا

من طرف **Shamsology** الإثنين أغسطس 30, 2010 7:59 pm

السلام عليكم

هنكمل الجينرال شيت النهاردة إن شاء الله

بس الأول مننساش النية :

إفادة المسلمين ورفع الحرج عنهم

وقفنا المرة اللى فاتت عند الـ Compliant

Compliant الشكوى

وهى دى بيت القصيد

أساس الشيت كله شكوى العيان

يعنى هو دافع لك الكشف بيضة وكوزين درة علشان يجى يقولك الشكوى بتاعته

فلازم يكون عندك فن الآستماع يعنى أيه ؟

يعنى اسمع شكوى العيان باهتمام يقول ديل كارينجى فى كتابه الرائع
(( كيف تكسب الأصدقاء وتؤثر فى الناس )) : (( إن أكثر الناس يستدعون الطبيب لا ليفحصهم وإنما ليستمع إليهم ))

وحقا لقد صدق الرجل ، كنت أعمل فى مركز للمخ والأعصاب فى بداية الامتياز

و كانت وظيفتى إنى أخد شيت من العيان

كان المرضى يقولون لى يادكتور أسمعنا وأكتب للدكتورة أصلها مبتسمعش لنا

الدكتورة لاخلاف على إنها شاطرة لكن مبتسمعش العيانيين وهما ملاحظين الحكاية دى

ومأثره معاهم أنا طولت فى النقطة دى كتير لكن فعلا أنا شايف إنك لو عايز تنجح فى العيادة

لازم تكون مستمع جيد وأقرأ كتاب ديل كارينجى أو استمتع بحايتك للعريفى إن شئت .

نرجع للطب وسنينه

الـ compliant

باكتبها أزاى

Short يعنى كلمتين وبس مش موضوع لأنى لسه هأشرحها فى الـ present history

Pt. own words يعنى أيه ؟

يعنى زى مالعيان بيقولها أكتبها

برضه يعنى أيه ؟

مثلا يا دوك واحد جاى يشتكى من كرشه نفس أنت هتكتبها كرشه نفس بس بالأنجيلزى

أزاى ؟

هكتبها shortness of breath

هى دى كلمة كرشه نفس لما جون فى أمريكا يقولها

أمال أيه dyspnea دى ؟

دى كرشه نفس بس بالمصطلح العلمى جون مش هيقول dyspnea

لأنه مش عارفها دى كلمة علمية

والنقطة دى مهمه وخلى بالك منها

لأن الـ compliant أول حاجة الممتحن بيبدا يركز معاك

فيها فلو قلتله dyspnea هتبقى لجنتك بيضة إن شاء الله

منساش أكتب الـ duration

يعنى بقاله أد أيه بيشتكى

وكل الناس بتقع فى غلطة لغويه لماتكتب المدة

يقولك : since 3 days

مع أن since دى زى ماخدنا زمان فى الأنجليزى بيجى بعدها تاريخ مش مدة

طيب فى دكتور جهبذ من جهابذة اللغة الأنجليزيه هيقول تبقى for مش Since صح ؟

غلط يادوك برضه

لأن for حاجة فى الماضى يعنى كان بيشتكى من المرض ده لمده يومين فى الماضى

أمال نكتبها أزاى حيرتنا

نكتبها كده 2 days duration

عارف إنك اتخنقت منى علشان الكلام ده

لكن فعلا فى أساتذة بيعلقوا عليه

فمتديش حد فرصة يعلق عليك فى الشيت

عايزك تفرمهم فاهم

مثال للـ compliant :

Shortness of breath 2 days duration

شفت قصيرة أزاى وبكلمات العيان وكتبت المدة كمان compliant نموذجية

طيب لو العيان بيشتكى من حاجتين يعنى مثلا كرشه نفس وكحه

أكتب أى شكوى فيهم المسألة دى فيها قولين للعلماء :

الأول : أكتب الأتنين بالترتيب الزمنى وده أنا مش بفضله

الثانى : أكتب الشكوى الأهم اللى العيان هيقعد يكلمك عليها كتير

وده الرأى اللى بميل ليه

نيجى لتالت نقطة فى الشيت وهى

Present history

أو كما يحلو للبعض أن يسميه history of present illness

واختصارها HPI علشان لو شفتها متستغربش

أيه بقى الـ present history

ده اللى بنكتب فيه تفاصيل الـ compliant

يعنى ايه تفاصيل الـ compliant ؟

هى بتختلف من شكوى للتانيه يعنى مثلا كرشه النفس تفاصيلها مش زى الpain

لكن فى حاجات ثابته بسأل عليها العيان فى كل الـ complaints وهى :

1- onest

يعنى الحكاية دى بدأت معاك فجأة ولا بالتدريج ؟

2- course

يعنى المرض ده progressive بيزيد

or regressiveبيقل

or stationary ثابت

طب هسأل عليها أزاى هقوله ياحاج الألم اللى فى صدرك بيزيد ولا بيقل ؟

وده مهم

أيوه طبعا حاجة بتزيد

ممكن تبقى سرطان

لو حاجة بتقل غالبا Inflammation

3- duration

أتكلمنا عليها قبل كده لكن ممكن نقولها فى HPI

لو مكنتش قلتها فوق

يبقى أول تلاته فى HPI

Onset , course , duration

أختصارا O,C,D

طبعا أى حد فى طب الصومال هيعرف يكتب الكلمتين دول

المهم بقى اللى يفرق واحد عن التانى

مايسمى 4- leading questions

اللى بتتميز بيها كل شكوى

والأسئلة دى لازم تتحفظ يادكتور

زى ما الدكتور مطرى بتاع الجراحة كان بيقول : طالب الطب لازم يكون له دماغ زى القفه الدكتور

يشرح وهو يعبى فيها وبعدين يرمى كل ده فى الأمتحان ويبدأ يعبى غير ه وهكذا

نرجع للleading questions

يعنى مثلا الـ pain أى كان مكانه ليه كام سؤال معروفين

وهم

Site

Character

Radiation

Duration

What increase it

& what decrease

طبعا فى كل برانش هنعرف إن شاء الله الـ common complaints

و الـ leading question بتاعتها

5- treatment

يعنى خد علاج للشكوى ده ولا لآه وطبيعى أنى أسأله اتحسن على العلاج ولا لآه

6-associated symptoms

يعنى فى حاجة تانية غير الشكوى دى

مثال لل HPI

The
patient complaining from pain of sudden onset progressive course , 2
hours duration , started at chest radiated to the lt shoulder , arm
& forearm , in the for of heavness , increase by exertion , decrease
by sublingual nitrates , associated with syncope & sweating

ده الـ typical anginal or infraction pain

يبقى الخطوة الجاية أنى أطلب ECG

وبكده أبقى شخصت من الـ history

شفت أهمية الـ history

يتبقى لينا فى الشيت نقطتين مهمين وهم ال past history & family history

4-past history

مش هسأله عن مغامراته فى بلاد الواقواق

لآه هسأله عن ثلاث حاجات

مجموعين فى كلمه مقرفه DOD دود

Disease

Operation

Drugs

Disease أول حاجة

أشهر أمراض بسأل عليها

السكر والضغط وال TB والبلهارسيا طبعا

طيب هسأله أزاى ؟

بتتعالج من حاجة ؟ عندك سكر ضغط

جالك بلهارسيا

أتحجزت فى مستشفى صدر قبل كده

Drugs

بتاخد أدوية ياحاج

Operation

عملت عمليات قبل كده

طيب يادكتور هى الحاجات دى مهم ؟

طبعا

فى واحد صاحبى مركب صمام ميترالى

كان عنده حمى روماتزمية

وضربت الصمام وعمل عملية

واللى مركب صمام زى ما هتعرفوا فى النظرى

لازم ياخد دوا يزود سيوله الدم زى الـ warfrin

واسمه فى السوق ماريفان

علشان ميحصلش جلطات على الصمام الصناعى

جرعة الماريفان بتتحسب بعد عمل تحليل معين كده اسمه الـ INR

علشان الدوا ميعملش سيوله زيادة فى الدم ويعمل نزيف

صاحبى ده

كان بياخد الدوا بمزاجه من غير تحليل و لابتاع

كان بياخد 4 حبات فى اليوم

كمية كبيرة جدا

عملت له heamaturia & heamoarthritis

راح لدكتورة الوحدة يشتكى من الدم اللى فى البول

قالت له عندك الكلى وأدته شويه فوارت تعابنه من بتوع الكلى

أنا لحد دلوقتى مش عارف يعنى أيه عندك الكلى

المهم الدكتورة دى لو كانت سألته عن أى حاجة من الدود DOD

كانت خدت بالها أنه السبب الماريفان

بس أنا اعتقد إن بمستواها ده حتى لو كانت عرفت أنه بياخد ماريفان كانت

قالت عندك الكلى برضه

على فكرة القصة دى حقيقة مش تأليف

بس بتوضح لك أهمية الـ past history

أخيرا علشان الحصة دى مملة

Family history

بسأل فيه عن حاجتين

- فى حد فى العيلة بيشتكى من أمراض

لأن فى أمراض بتبقى واخده العلية ماشاء كلها

حاجة زى أنيميا الفول favism

أخوال العيل عندهم favism

تانى حاجة consanguinity

يعنى أيه الكلمة دى

يعنى تقوله أبوك وأمك قرايب

لأنه ده بيزود الأمراض الوارثية

متعملش زى واحد دخل الأمتحان وأول مرة ياخد شيت

فبيقول للعيان

أنت ومراتك أخواتك يا حاج ؟

على أٍساس أنه بيسأل على الـ consanguinity يعنى

بكده يبقى الجينرال شيت خلص

عارف إن الحصة مملة مش زى المرة اللى فاتت بس ليس فى الأمكان أحسن مما كان

دمتم بخير

الجينرال شيت فى الباطنه 2 Fw12