نزوة شايب .. لمني سليمان

صبغت شعرى من يومين
قاصد أجمل خلقتى
وفرقت قصة م اليمين
يمكن تدارى صلعتى
وقعدت على قهوة عطية
أشوف دى رايحة
وأشوف دى جاية
نفسى واحدة تبصلى
وتبثلى إعجابها بيا
ولاواحدة فيهم عبرتنى
هوانا فى الكون شوية
ليه بيتجاهلوا شبابى
والجمال اللى ف عينيا
صحيح همومى غيرتنى
بس صورتى هيَ هيَ
يمكن ظروفى كبرتنى
من سنين مرت عليا
تايه ف غربة دوبتنى
بعد عن أهلى وهيَ
سرسبت منى سنينى
عشرة ويزيدوا شوية
بس دى مش مشكلة
ولا بأعتبرها كمان قضية
القضية إن انا
مشاعرى شابة مدارية
لا الزمن غير ميولى
مهما زود من حمولى
لسه جوايا الشقاوة
نفسى أدوب ويا الحلاوة
والطعامة الربانية
وأنسى إنى عجوز وشايب
والزمن صاحب مقالب
فوت الفرصة عليا
إنى أتجوز بنية
تكون سند فى الغربة ديا
وتهادينى بطفل باهر
مبتسم يشبهها هيَ
إيه اِل انا قاعد بأقوله ؟
ليه بالكلام أخدع فى روحى
إخفى يانزوة وروحى
وإرجعى ياهيبتى ليا
منى سليمان