أدخل برجلك اليمين ... وعرفنا بيك هنا

من طرف Just a doctor الخميس أكتوبر 28, 2010 11:50 pm

هل تسمعني
للشاعر/ على سلامة

ألو ألو..

هل تسمعني؟!

بكلم حضرتك من قدام..

فرن الحاج أبوصلاح..

كله سعادتك تمام..

والشعب مستمر ف الكفاح..

لا يا فندم مفيش قلق..

شوية كسور وكدمات..

واللي مات مات..

واللي راح راح..

الحمد لله زي الفل..

ويا رب ديماً..

من نجاح لنجاح..

معايا يا فندم..

ورحمة أمي مبسوط ومرتاح..

كله من خير سعادتك..

إحنا بس محتاجين خميرة بيرة..

لأ يا فندم.. بيرة إيه

أستغفر الله..

هو أنا بتاع كده..

أكلم حضرتك بعدين بقي..

عشان تقريباً الكارت خلص..‬

من طرف Just a doctor الخميس أكتوبر 28, 2010 11:51 pm

ألو ألو..

هل تسمعني..

بكلم معاليك..

من محطة أبوغريب..

هو يا فندم القطر..

اللي لا بيودي ولا بيجيب..

العتمة الكتمة..

الزحمة الكئيب..

الشعب..

ماله الشعب..

فرحان وإحساسه عالي..

وكل الحالات بتستجيب..

معانا يا فندم..

أجزخانة لكل مواطن وطبيب..

مرهم للحروق..

ورحمة أمي بعت أجيب..

طب يا فندم عشان القطر اتحرك..

الموت علينا حق يا فندم..

واللقا نصيب..‬

من طرف Just a doctor الخميس أكتوبر 28, 2010 11:52 pm

الو الو

هل تسمعني

بكلم جنابك من عزبة شحات العريان

دى حتة كدة يا فندم

بعيدة عن العين

لكن قريبة من حلوان

مفيش ميه يا فندم

لكن مفيش حد عطشان

نور

ملوش لزوم النور كفاية الاحساس بالامان

انا

ورحمة امي زي الفل

مناخيري

لا .. ده دور برد من زمان

الشعب

مبسوط وبيغني وفرحان

ما هى مصر حضرتك

امبارح كسبت السودان

طيب يا فندم

عشان تقريبا البيت بيقع

لا اله الا الله‬

من طرف Just a doctor الخميس أكتوبر 28, 2010 11:52 pm

ألو ألو..

هل تسمعني..

بكلم معاليك م المستشفي..

آه والله العظيم..

تصور..

كبد البلد سليم..

ووشها منور..

قطن وشاش..

لأ يا فندم ما يلزمناش..

ده الشعب كله متعور..

دكاترة..

أشعة..

تحاليل..

ده ترف يا فندم..

أوامر سعادتك..

ورحمة أمي هادور..

رسم قلب..

عارفة يا فندم..

بتاع طويل كده ومدور..

بعد إذن حضرتك يا فندم..

جالي كرشة نفس..

تقريبًا بموت..

الدوام لله يا فندم..‬

من طرف Just a doctor الخميس أكتوبر 28, 2010 11:53 pm

ألو ألو..
أوطي صوت التليفزيون إزاي يا فندم..
ده أنا بتكلم من سوق الخضار..
طول عمرها القوطة مجنونة سعادتك..
بس الجديد بقي الخيار..
والبطاطس..
هايصة خالص..
عشان الزيت أسعاره نار..
والكوسة شكلها يفرح..
ماشفتهاش أبدا كده..
والشمس طالعة..
وف عز النهار..
المواطن..
نفس الابتسامة العريضة حضرتك..
هيموت م الفرح..
خصوصا بعد ما سمع..
عن علاج البواسير بدون جراحة..
إمبارح ف نشرة الأخبار..
المشكلة أنا يا فندم..
من يومين كده..
ابتدي يلعب ف عبي..
ييجي مليون فار..‬

من طرف Just a doctor السبت أكتوبر 30, 2010 11:54 am

إيوه يا فندم..
بكلم سعادتك م الاستاد..
عارف يا فندم إن المباراة مذاعة..
بس قلت أشيل علم..
وأفسح الولاد والجماعة..
أنا..
أهلاوي يا فندم..
ورحمة أمي عن قناعة..
الأهلي حضرتك..
مش إجوان بحرفنة وشجاعة..
الأهلي رغيف العيش..
أنبوبة البوتاجاز..
والسد العالي..
اللي بيحمي مصر من المجاعة..
هو البطل..
هو عم توفيق التمرجي..
اللي بيدي حقنة ف العضل..
ينام الألم كام ساعة..
مصدر الفرح الوحيد للشعب..
والزمالك أكيد..
مقدر الظرف الصعب..
تصور الموقف يا فندم..
لو الأهلي ماعندوش قلب..
أو بعد الشر بعد الشر..
اللاعيبة عضهم ف رجليهم كلب..
وراح الدوري والكاس..
قوللي بقي سعادتك..
هاتفرح بإيه الناس..
طبعًا الزمالك..
هايعمل م القصيدة دي شماعة..
وكل مرة يتغلب ستة..
وهات م الشبكة يا معلم..
طب يا فندم
أكلمك بعد الماتش..

من طرف shaymaa okasha السبت أكتوبر 30, 2010 3:27 pm

يا خبر ابيض ؟؟؟؟
هي اتكركبت فوق راسنا ليه كده مره واحده؟؟؟؟
فظيعه بجد
انا دوخت منها حسيت اني واقفه في نص ميدان التحرير والعربيات بتجري من حواليا بسرعه فظيعه

احييك بجد thumbs up

من طرف Just a doctor السبت أكتوبر 30, 2010 3:34 pm

shaymaa okasha كتب:يا خبر ابيض ؟؟؟؟
هي اتكركبت فوق راسنا ليه كده مره واحده؟؟؟؟
فظيعه بجد
انا دوخت منها حسيت اني واقفه في نص ميدان التحرير والعربيات بتجري من حواليا بسرعه فظيعه

احييك بجد

شكرا يا شيماء هل تسمعنـــى 25851

من طرف **abdoo** السبت أكتوبر 30, 2010 3:36 pm

سيبك من الطب يا محمد Very Happy

من طرف Just a doctor السبت أكتوبر 30, 2010 3:38 pm

مش أنا اللى كاتبو يا عبدو Very Happy

بس هو عجبنى

من طرف **abdoo** السبت أكتوبر 30, 2010 3:45 pm

طيب خليك ف الطب rolling on floor lau

تحفة بجد

من طرف Just a doctor الأحد أكتوبر 31, 2010 7:03 pm

آلو آلو..
عقبال أولادك يا فندم..
بكلم سعادتك من فرح هاي هاي..
ف فندق خمس نجوم..
لأ ورحمة أمي..
أنا مش معزوم..
ولا قريب العروسة..
ولا من طرف المرحوم..
أنا جاي مع ابن خالتي..
شاب زي الورد..
بيشتغل ف الأمن..
وخريج علوم..
رقاصة..؟
فيه سعادتك..
بس مؤدبة يا فندم..
وبترقص وهي لبسة الهدوم..
فيه سعادتك حلويات..
وعيش طري..
وبتاع كده بشنبات..
بيقولوا عليه جمبري..
ينقطع لسان الكداب المفتري..
اللي يقول علينا شعب جعان..
أو مش لاقي ياكل..
أو محروم..
طب يا فندم سعادتك سهران شوية..
عشان بس البوفيه خلاص..
والناس إبتدت تقوم

من طرف Just a doctor الإثنين نوفمبر 01, 2010 9:00 pm

آلو آلو..
أيوه سعادتك..
معاك يا فندم..
أنا أصلي بتكلم م الميكروباص..
زي الفل ورايقة وحلوة الناس..
يا فندم انت اللي سعادتك بقيت حساس..
هي إيه العبارة..
دي معاليك مش زحمة..
ده ونس..
دي تقريباً مصر كلها..
واقفة ف الإشارة..
يا فندم قلنا كتير..
كل مواطن قبل ما ينزل م البيت..
يصلي صلاة استخارة..
المواطن..
أهو بيضحك قدامي أهوه..
وزي الفل ومبسوط..
ما هو لما يموت..
في ميكروباص ع الكورنيش..
أشيك بكتير برضه..
من الغرق في عبارة..
لأ يا فندم مش أنا اللي بصوت..
دي المدام..
اللي قعدة قدام
تقريباً بتولد..
الله أكبر يا فندم هلت البشارة..
طول عمرك يا مصر ولادة..
وتاريخ..
ومجد..
وحضارة..
بعد إذن سعادتك..
الآنسة اللي جنبي يا فندم..
تقريباً بتحبني..
آه ورحمة أمي..
كل شوية تقوللي..
دمك خفيف شربات..
يا اسمك إيه..
يا واد انت..
يا سمارة..
مع إني أبيض يا فندم..
بس ها نعديها سعادتك.

من طرف Just a doctor الثلاثاء نوفمبر 02, 2010 10:26 pm

...ألو ألو..

بكلم جنابك..

من هيئة الأرصاد..

حالة من الطراوة سعادتك..

بتسود البلاد..

حر..

بعد الشر يا فندم..

ورحمة أمي دي موجة..

بس جت بدري شوية..

قبل المعاد..

يا فندم الجو لطيف..

ومن بكرة هانلبس خفيف..

صافي يا فندم صافي..

بس الرؤية معدومة..

إحنا كده يا فندم..

أي حاجة نقول الحكومة..

المواطن..

اسكت اسكت..

اتعلم الشقاوة..

وبيعمل إضراب..

وبيتكلم عن الفساد..

وبيقول كفاية..

ألو ألو..

أيوه يا فندم..

إنت معايا..

ألو..

يا نهار أسود..

ده الموبايل فاصل..

هو أنا كل ده بكلم نفسي..

يللا بقي كل شيء نصيب..

من طرف Just a doctor الأربعاء نوفمبر 03, 2010 9:23 am

ألو ألو..
هل تسمعني..
بكلم معاليك م الطريق الزراعي..
...لأ يافندم..
دي مش نمرتي..
ولا ده..
الموبايل بتاعي..
حاجة تفرح سعادتك..
ده تقريبا مصر كلها..
مزروعة برسيم..
طول عمرنا أصحاب حضارة..
ونقدر البهيم..
نعم يافندم..
قمح..
سنابل..
قطن..
إحنا هانعيده تاني سعادتك..
ونرجع للعصر القديم..
نعم حضرتك..
أزمة..
مين قال كده يافندم..
كداب ف أصل وشه ولئيم..
آي..
ده أنا سعادتك..
لمؤاخذة الحمار رفصني..
ف مكان حساس..
متقلقش خالص سعادتك..
أنا زي الفل وسليم..
ورحمة أمي مش تعبان..
طب يافندم أكلم حضرتك بعدين..
عشان الراجل صاحب الموبايل قلقان.

من طرف Just a doctor الجمعة نوفمبر 05, 2010 12:14 am

آلو آلو
هل تسمعني
بكلم سعادتك
من غرب السكة الحديد
ناس تقول ده وجه قبلي
وناس تقول عليه الصعيد
لا يا فندم ده فركة كعب
بس لسه بعيد
المواطن؟!
علي حطت إيدك يا فندم
ورحمة أمي سكر
زي ما سيبته
ومفيش جديد
فيه سعادتك ضحكة حلوة بس ما اتخبطش لسه
ف واحد سعيد
أنا؟!
زي الفل
الواد ابني
نجح بتفوق سعادتك
حتة ملحق صغير ف الرياضة بس تقريبا ها يعيد
طب يا فندم
عشان بتكلم م السنترال
وسعر الدقيقة
كل شوية بيزيد
مستورة سعادتك والحمد لله

من طرف Just a doctor الجمعة نوفمبر 05, 2010 6:23 pm

آلو آلو..
هل تسمعني..
...عارف بكلم سعادتك منين..
حزر فزر كده يا فندم..
لا يا فندم فرن إيه..
ورحمة أمي بكلمك م الأوبرا..
عرض روسي..
أيوه سعادتك باليه..
حلاوة وشقاوة ورشاقة..
أقول إيه بس يا فندم..
ولا إيه..
أهي فسحة برضه سعادتك..
أتفرج..
وأحاول أفهم اللي أقدر عليه..
لا يا فندم معايا دعوة..
الواد ابن اختي جدع أوي..
ويعرف سيد بيه..
مشكلة صغيرة بس يا فندم..
سمحوا بدخول العيال..
وأنا والجماعة لأ..
مش عارف ليه..
طب يا فندم..
أنا ف قسم قصر النيل..
آه هو قصر النيل..
مش كده يا باشا..

من طرف Just a doctor السبت نوفمبر 06, 2010 11:22 pm

آلو آلو..
هل تسمعني..
أيوه يا فندم..
...أنا تقريبًا ف الهو..
بكلم سعادتك من ع الحدود..
مفيش هنا أي حاجة يا فندم..
بس الجودة برضة ف الموجود..
لا يا فندم..
المواطن هنا..
قماشة تانية خالص..
لا مدرسين ولا مدارس..
ولا أمل ولا وعود..
بس ابتسامة الرضا..
والسعادة كلها بقي..
عارف سعادتك الإحساس..
بأن الطريق مسدود..
أنا..
لا يا فندم أنا أعيش..
ف أي مكان..
أنا ابن ناس ومدلع..
سعادتك ما تعرفش..
إني آخر العنقود..
ماتشغلش بالك..
معايا ورحمة أمي..
يا فندم كفاية الجو الروحاني..
والقمر..
والصحرا..
يمكن أحتاج بس أجرة السكة..
لو فيه نصيب..
وهانعود..
طب يا فندم..
السلام أمانة بقي

من طرف Just a doctor الجمعة نوفمبر 12, 2010 1:24 pm

آلو آلو..
أيوه سعادتك..
سامعني كده كويس..
صوتي!
زي الفل يافندم..
بس تقريبا م الخضة..
لسه محبوس..
أصلي حلمت إمبارح..
حلم حلو أوي..
بس زي ما يكون كابوس..
لأ خير سعادتك..
واحد طويل وعريض وكبير..
بقوله إنت مين..
قاللي أنا عذاب الضمير..
كتم نفسي..
وفضل يضغط ويدوس..
مع إني عمري..
ما أذيت حد ورحمة أمي..
ده أنا كل اللي بعمله..
إني بهدي النفوس..
حتي لما محفظتي اتسرقت..
قلت المهم الرقم القومي..
وف ستين داهية الفلوس..
لا يافندم..
أنا بنام ع الكنبة..
اللي ف أوضة الجلوس..
بطانية؟!
عندي سعادتك..
ماركة جبهالي من بره..
ابن خالتي..
الأستاذ محروس..
لا يافندم شقاوة إيه..
أنا؟!
معقول؟!
خلبوص؟!
لأ يافندم..
إنت مخ سعادتك..
راح لبعيد أوي..
قال شقاوة قال..

من طرف Just a doctor الجمعة نوفمبر 12, 2010 1:27 pm

تنتخبوا مين..؟

صرح صاحب المعالى

وأكد..

وشدد..

وحدد..

وريح..

ومدد براحته..

واستعرض..

وهدد..

وبانت صراحته..

وأشار..

وأشاد..

وقرر..

ونفى..

واختفى..

وطفى النور

وأضاف..

وشد اللحاف..

ونام..

آخر كلام..

فى نظام مستبد

ومعارضة هشة..T

والله لو نجيب مليون مقشة..

ما عمرك هتنضف يا شارع الكدابين..

تنتخبوا مين..؟

نفس الوجوه واليفط

اللى دابت وشاخت من سنين..

تنتخبوا مين..؟

ده نائب..

ودى قصته..

تلاتين قرار لعلاج آلام رموش عيون المدام

وتصليح ركبته..

ومفيش قرار واحد يوحد ربنا

من أجل أبناء دايرته..

تنتخبوا مين..؟

ده قمار..

ودى موبايلات..

ودى تربيطات..

ودى مصالح..

ودى مخدرات..

ودى دعارة..

ودى تجارة بالدين..

وده صندوق الانتخابات..

تنتخبوا مين..؟‬

من طرف **sose** الخميس ديسمبر 02, 2010 6:34 pm

بجد حلوة اوى انا بحب النوع ده من الشعر جدا thumbs up

من طرف Just a doctor الجمعة ديسمبر 03, 2010 6:42 am

sose كتب:بجد حلوة اوى انا بحب النوع ده من الشعر جدا

شكرا لحضرتك هل تسمعنـــى 419526

أدخل برجلك اليمين ... وعرفنا بيك هنا

تسجيلات د/هاني رفيق جراحة.. 2013

تسجيلات د/المطري جراحة .. 2012/2013

تسجيلات د/محمد السكري - نسا .. 2012/2013

تسجيلات د/ياسر جراحة .. 2013

تسجيلات د/أسامة باطنة .. 2012/2011

تسجيلات د/أ* ح* أطفال .. 2012/2011

ENT : تسجيلات د/عمرو جودة .. 2010/2011

رمد : تسجيلات د/حسين سويلم .. 2010/2011

شرعي : تسجيلات د/ياسر ... 2010/2011

كومينيتي : تسجيلات د/سيد العقدة .. 2010/2011

هل تسمعنـــى

هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى

رد: هل تسمعنـــى