إززززز - هيثم دبور

بجد انتو ناس جامده
موضوع حلو اوى انا بحب كتابته ومقالاته اوي

اسم مشتبه

بقلم هيثم دبور ٦/ ١/ ٢٠١١

لأنك مشترك فى القهر

وراتبك مش مكفى الحاف لآخر الشهر

وزهقان من فاتورة النور

وواقف فى طابور بالدور

تمللى موقعك آخره

لأنك بتشاركنى الخوف

وسعر الشاى على الدخان فى يوم ما يقرروا يغلوا

ولما نقلب الدنيا على السكر

وما نلقيهوش

وأملك إننا نغير

فنلقى م الآمال دى فشوش

وباسبورك على الكوميدينو مستنى

وفى الحمام تسيب جركن مليته بجاز

وكام بنوتة حبيتها

لكن بتخاف تقول يا جواز

لأنك زيى فى طيبتى

وخيبتك نسخة من خيبتى

واسمك مشتبه زيى

يجوز مسلم.. يجوز قبطى

فى إيه فى الدنيا يجبرنى..

بإنى أكرهك أصلاً؟!

الصورة الوردية

كتب هيثم دبور ٧/ ١/ ٢٠١١

جمالك مزيف
ولافيش مراية هتقدر تقولك
بإنك يا حلوة جمالك صناعى
واقطع دراعى..
بإن إنتى عارفة
وخايفة تواجهى انعكاس المراية
وبصى فى عينيا وواجهى الحقيقة
دى عدسات بلاستيك
وكحل فى عينيكى يسيح مع دموعك
يهبب خدودك
ويخلط دهان ابتدعتى فى رسمه
عشان توهمينا إن صورتك جميلة
وكام ألف ماشطة تحاول تغيّر
ما باليد حيلة
عرفتى إن غشك وزيفك وقبحك
وروج الشفايف ولون الضوافر
ومكياج وبودرة
يبوظوا فى ساعة ما ينزل عليهم
يدوب أى دمعة

هنا يرقد فلان

بقلم هيثم دبور ١٣/ ١/ ٢٠١١

إيه اللى فاضل جوّه أرضك غير سجون

وسجانين

وناس تموت لجل الخروج

وناس بتخرج بس أنصاف ميتين

يا هل ترى ياللى بيفصلنا الحديد

انت اللى مسجون وللا أنا؟!

أمانة لو يوم روحى طلعت جوّه أقسام البوليس

وكنتوا لسّاكم هنا

تحطوا اسمى فى كل حتّه..

وقبله ضيفوا «كلنا»

الإجابة: تونس

كتب هيثم دبور ١٤/ ١/ ٢٠١١

مبطّل إنه لما ينام..
يقول بكره هتتدبر
وهى عصية على روحه.. ما تتدبرش
يدق المارش خلف المارش
ومجدافه اللى متكسّر..
دراعه فداه وما اتكسرش
بيخلع خوفه عن كتفه
ويخرج فى البلد عريان
خروجه حقيقى ما يهزرش
وإذا امتحنوك بمنهج صعب
مهوش محطوط ومتقرر
وسألوا سؤال عن الدافع
فقول إنه فى يوم ما شب
لقى إن الوطن أصغر
فقرر يخرج الشارع
ويسأل نفسه ويدوّر
كدبتوا ليه سنين وسنين
يحيى فى العلم.. ينشد
تعيش ليّا وطن أخضر
وهو قفر ما انخضرش

كبريت

بقلم هيثم دبور ٢٠/ ١/ ٢٠١١

فى جيبى عود كبريت دايماً ملازمنى

سألت نفسى كتير ليه بس لازمنى؟!

يمكن عشان قلقان

خايف لعقلى يشيط

أو يتحرق قلبى على شىء أنا حابه

وعشان كده مصاحبه

كسلاح أخير فى الجيب

وإمتا وقته يحين؟

حاجة فى علم الغيب

راح أولعه لمبة فى ليل غميق كحلى

فوانيس أمل فى السجن

طاقة دفا فى الجب

أو حتى شمعة حب

شعلة غضب فى إيدين بشر بيتظاهروا

لكن بخاف أكتر أكون فى لحظة خوف..

ولعة سيجار فاخر

نفسين حشيش فاضلين

خلة سنان تافهة

طرف الورق محروق لقصيدة كدابة

قارئها صدقنى

فى جيبى عود كبريت..

بخاف ليحرقنى

«من ديوان (حالة المصرى.. بشر وبواقى حياة) - تحت الطبع)

هو من هيثم دبور ده بجد
و لا اسم مستعار

هو اللي بيكتب الشعر ده ياتريكة في المصري اليوم

انا جبت ’’ البقاء لله ’’ قبل كده يا سوسي

اقصد ده اسم حقيقي
و لا مستعار

..

....

....

....