اولى طب عين شمس اجمع

بسم الله الرحمن الرحيم
بصوا يا شباب أنا هتكلم عن التقسيمة بتاعة المناهج على حسب السنة الدراسية بتاعتى اللى هى فاتت دى علطول 2009/2010

افتكروا ان انتم عندكم أربع مواد هما
أناتومى ـــــــــ> من 250 درجة
فسيولوجى ــــــــــــــــــ> من 250 درجة
هستولوجى ــــــــــــــــــــــــ> من 150 درجة
كيمياء حيوية ــــــــــــــــــــــــــــــــ> من 150 درجة


أنا هتكلم الأول عن الأناتومى
الأناتومى باختصار هو علم التشريح
هو مادة لذيذة جدا وأنا عن نفسي كنت بحبها جدا

أولا :- بالنسبة للمنهج:-
هو عبارة عن خمس كتب فسنة أولى Introduction , upper limb,lower limb,thorax ,Embryology

نبدأ واحدة واحدة بأول كتاب هو الانترودكشن .....هو كتاب صغير ولذيذ جدا فالأول بيتهيألك نه صعب بس ده عشان المصطلحات الجديدة...وكدة كدة كل اللى فيه هيتعاد تانى طول السنة
وفآخر السنة بيتقرى فربع ساعة وبييجي عليه سؤال ب10 درجات فالمتحان التحريرى...وعلى فكرة هو مترجم ...الصفحة فيه مقسومة نصين نص انجليزى وقصاده ترجمته بالعربى بس الصراحة الانجليزي كان اسهل من العربى بتاعه
الكتاب ده باختصار بيشرحلك أسماء حرجات الجسم وأسماء العضم وأنواع العضلات والمفاصل ونبذات مختصرة عن أجهزة الجسم زى الجهاز الدورى والغددى والعصبى واللمفاوى والجلد
بياخد حوالى 3 اسابيع فالمحاضرات ومبتبدأوش سكاشن المشرحة الا لما يخلص

* نيجى لتانى كتاب ال upper limb
الكتاب ده فآخر السنة اكتشفت انه أسهل كتاب بعد الانترودكشن وده لانك بتاخده من أول السنة فبتقعد تعيد وتزيد فيه كتير
الكتاب ده بيتكلم عن الطرف العلوى اللى هو الكتف والدراع والايد
وبيشرح كل منطقة فيه بعضلاتها بأعصابها بالشرليين والآوردة اللى بتغذيها
وبيشرح كمان أنواع المفاصل فيها وايه اللى بيحصل لو عصب اتقطع
هو مهم فى ال cases وبييجى الbreast فيه كتير

* بعد كدة هتخشوا عالlower limb
اللى هو الطرف السفلى هتمشوا بنفس التقسيمة فكل أجزا}ْه الفخذ والرجل والقدم
المفاصل بتاعة الكتاب ده أهم بكتير من الأبر وخصوصا الركبة Knee والحوض Hip

*بعد كدة نيجى على ال Thorax
الكتاب ده بيشرح منطقة الصدر والقفص الصدرى والقلب والررئتين وكل اللى جوا القفص الصدرى وفوق الحجاب الحاجز
معظم الناس بتقول ان ده أسهل كتاب لكن انا بصراحة شايفو أصعب واحد وخصوصا انه السنة دى اتشرح فالاخر فاتكروت شوية
أنا بصراحة يمكن استصعبته شوية لأنى رميته ومكنتش بذاكره بسبب الناس اللى قالتلى انه سهل
وعلى فكرة السنة دى هو أكتر فرع جه عليه فالتحريرى آخر السنة جه عليه 15 درجة
فنصيحة اهتموا بيه كويس يا شباب

*نيجى بقى للمعلم الامبريولوجى
ده يعنى علم الأجنة أى نعم الكتاب كبير بس انت مش هتاخده كله السنة دى لكن هتاخد أجزاء منه وبقيته فتانية ان شاء الله
هتاخد حاجة اسمها General embryology ده حوالى 20 صفحة فالكتاب بيتكلم عالجنين عموما من ساعة الاخصاب وكدة وكلام ثانوية عامة
وبعديها ال special embryology بتاخدوا فيها تطور الأطراف development of limbs وتطور الجهاز التنفسي Respiratory system والجهاز الدورى CVS
لو لاحظتوا هتلاقوا ان الكلام ده خدتوه فالناتومى العادى فعشان كدة بتااخدوا الامبريولوجى بتاعه والباقى هيكمل فتانية باذن الله
على فكرة الامبريولوجى مش بيتاخد فآخر السنة لوحده لا ده بيتاخد على مدار السنة محاضرة كل أسبوع بحيث انك تربط الاناتومى العادى بالامبريولوجى
وعليه 15 درجة فامتحان التحريرى آخر السنة

ثانيا بالنسبة لرئيس القسم :-
السنة اللى فاتت كانت دكتورة كاريمان كانت ست طيبة ولذيذة بجد مثال حى للدكتور اللى فاهم
دكتورة كاريمان كانت ماسكة لمدة 6 سنين من 2004 ولسة ماشية
السنة دى اللى مسك دكتور محب وناس كتير بتقول انه بيدقق على أتفه التفاصيل فبالشفا ان شاء الله احنا وانتوا

ثالثا : توزيعة الدرجات
السنة دى دكتورة كاريمان كانت طيبة جدا
عملتلنا 3 امتحانات assesment يعنى أعمال سنة وكلهم mcq طبعا وخدت أعلى 2 منهم بمعدل 15 درجة لكل امتحان يعنى 30 درجة للامتحانين
كمان امتحنتنا امتحان عملى فالمشرحة كدة كتجربة علشان نتدرب لامتحان آخر السنة وكان عليه 10 درجات ــــــــ> كدة يبقى 40 لغاية دلوقتى
وبعد كدة امتحننا امتحان العملى فالمشرحة كان عليه 60 درجة بصراحة كان سهل هو عيبه بس فالرهبة قبل الامتحان ...متخافش انت بتبقى واخد الحاجات دى طول السنة وعايد عليها مرة واتنين وعشرة
ثم جه امتحان آخر السنة :-
الشفوى كان عليه 15
والتحريرى عليه 135 درجة منهم 20 لل casesو 60 للmcq
+55 لل essay اللى انت بتدش فيه اللى انت حافظه طول لسنة
كدة يبقى المجموع 250 درجة والامتياز فيها من 212 ونص
على فكرة الأناتومى أكتر مادة تجيب فيها تقدير وده فعلا سمعته كتير طول السنة واتأكدت منه فالتقديرات ىخر السنة
يتبع باذن الله.......................

رابعا : بالنسبة للمحاضرات والسكاشن :-
أنا شايف ان المحاضرات كويسة بس نصيحة لوجه الله لو شايف ان فى دكتور بيشرح محاضره وانت مش فاهم منه متحضرش ممكن تحضر لأى دكتور فى جروب تانى أو تذاكر فبيتك صدقنى هتستفيد أكتر فمتحاولش تقعد تصيع وقت وانت مش فاهم علشان ترضي ضميرك
السكاشن :طول السنة بتبقى لذيذة وكويسة وبتبقى فالبريلاب والمشرحة
فرأيي ان السكاشن وخصوصا الأناتومى مهمة جدا بس لو انت حاسس نفسك مش مركز ومش هتفهم روح و بعدين احضر السكشن فأى معاد تانى فالآناتومى مبيدقوش ومفيش غياب
والأحسن كمان انك تبقى محضر أو عالأقل قارى اللى هيتشرح فالسكشن هتستفيد أكتر

خامسا: بالنسبة للمذاكرة :-
انت ممكن تذاكر من الكتاب عادى بتاع القسم هو مرتب وكل حاجة بس مشكلته ان كلامه كتير
السنة اللى فاتت كان فى كتاب القسم الى نزلته دكتر كاريمان الله اعلم السنة دى دكتر محب هيعمل ايه؟ وكان فيه كتاب دكتر سامح دوس من جامعة القاهرة فى ناس جابته بس بصراحة مش هتستفيد منه الاستفادة اللى هى علشان هو جامعة القاهرة

الملازم فيه ملازم دكتر يوسف كانت مختصرة ولامة المنهج فيه ناس ذاكرت منها وقفلت وجابت امتيازات هى مرتبة أكتر من كتاب القسم
فيه ملازم دكتر عباس بس ملازم الهاند ( اللى كاتبها وراسمها بايده ) مش هتفهمها لو مكنتش بتاخد معاه
دكتر أسامة معرفش عنه معلومات كتير بس هو شاطر وخصوصا فالامبريولوجى جداااااااااااااا
وياريت لو دخل فأى وقت يشرح امبريولوجى تحضروا محاضراته ومتفوتوهاش لأنه راجل عشرىة على عشرة


كدة أنا خلصت كلامى عالأناتومى بس لو افتكرت حاجة تانى هبقي أزودها ان شاء الله

تانى مادة هتكلم عنها دلوقتى هى الهستولوجى :-




الهستولوجى هى مادة ناس كتير بيقولوا عليها مادة العقم الطبى لأنها مش طبية بمعنى الكلمة وبيتطلب فيها حاجات منك مالهاش علاقة بالطب


أولا :بالنسبة للمنهج :-

المادة بتبدأ أول السنة انك بتاخد حاجة اسمها micro technique ودى حاجة فالول بتشرحلك انواع الصبغات اللى بتصبغ يها الأنسجة وفيها كمان بتعرف الفرق بين الميكروسكوب الضوئى والالكترونى وشوية كلام عن تحضير العينات اللى بتتفحص تحت الميكروسكوب وطرق تحضيرها
ده فصل تافه مبيجيش الا mcq أو يتسأل شفوى ...هو مبيتاخدش فالمحاضرات لكن بيتشرح فى بداية السكاشن

بعد كدة بتبدأ أول شابتر اسمه cell يعنى الخلية وده بتاخد فيهتعريف بالخلية من حيث كل حاجة بالتفصيل يعنى العضيات اللى جوا زى النواة والميتوكوندريا وجولجى وغيرها كتير
هو الفصل ده بيطول كتير ممكن يقعد شهر بس أهم حاجة انك تطلع منه بحاجات معينة فى كل عضية أو جزء بتدرسه
وده انك تعرف وصفه من حيث الميكروسكوب الالكترونى EM والضوئى LM والصبغة STAIN ووظيفته ومكانه فالخليه
على فكرة الشابتر ده يعتبر أطول شابتر فالمنهج بس أسهل واحد واسئلته فآخر السنة سهلة وبيتذاكر بسرعة وبسهولة قبل الامتحان ...أنا قريته ف5 دقايق قبل الامتحان أى نعم محلتهوش بس العيب كان عندى انا مش من الشابتر

بعد ال cell بتخش على شابتر اسمه epithelium اللى هو النسيج الطلائي د فصل بصراحة غتت لأن كله حفظ وأمثلة لأنواعه كتير والمفروض تبقى عارف كل نوع منهم موجود فين بس بردو على آخر السنة لو اتقرى كذا مرة هيبقى سهل

فيه بعديها فصل اسمه ال connective tissue اللى هو النسيج الضام ...د ه لذيذ بتاخد أنواع الخلايا فيه و الألياف ووصف كل منها بدقة

خد بالك ان فصل ال epithelium وفصل ال connective أساس لكل اللى جاى لأنهم بيتعادوا فحاجات تانية قدام فحاول على قد ما تقدر تاكرهم من الأول كويس ومن مصدر محترم

بعد كدة بتبدأ تاخد فصول صغيرة بتاخد فيها انواع ال connective كل واحد لوحده بالتفصيل
أولهم بيبقى ال cartlage اللى هو الغضروف بتعرف أنواعه والخلايا المكونة ليه وامثلة عليه.... الفصل ده فالكتاب بالظبط كان 4 صفح وسهل أوى
تانيهم هو ال اBoneالعضم والفصل ده أطول شوية بس بردو يهل وغالبا بيجى مقارنة مع الا cartilage
على فكرة الفصل ده من ورق دكتر حجازى كان رائع ومرتبه ترتيب كويس أنا مفهمتهوش الا من ورقه قبل الامتحان ب3 ساعات بس ودخلت جاوبته الحمد لله
تالت نوع بقى هو ال Blood الدم يعنى الفصل ده فيه حاجات كتير هتلاقيها مكررة من الفسيولوجى لأنك هتاخد البلاد فالفسيو فالأول
أرخم حاجة هتلاقيها فالفصل ده هى المقارنات بين أنواع الخلايا بس ممكن تتلم لو من بدرى

بعد كدة بتدخل فنسيج تانى أصل انا نسيت أقوللكوا ان انسجة الجسم الأساسية أربعة ـــــــ> epithelium,connective,muscular,nervous
احنا بدأنا بعد كدة فى ال muscular اللى هو النسيج العضلى ..على فكرة الفصل ده بردو سهل وهتلاقوا 95 % منه متكرر من الفسيولوجى وهو مشروح فكتاب ماهر عملرة كويس جدا

لغاية هنا خلص منهج الترم الأول...بس شيلوا منه ال Blood عشان خدناه فالترم التانى مع الباقيين نظرا لظروف أنفلونزا الخنازير

نيجى لمنهج الترم التانى
أول حاجة خدناها كانت ال nervous tissue النسيج العصبى من حيث أنواع خلاياه وتركيبها وشكلها ولو اتقطعت هيحصل ايه وانواع ال ganglia
والفصل ده كان متظبط كويس جدا فورق دكتر حجازى ومترتب كويس

بعد كد ة خدنا ال blood اللى انا لسة مكلمكم عنه من شوية

بعد كدة بتاخد حاجة اسمها vascular system ده بيتكلم عن انواع الاوعية الدموية وتركيبها زى الشرايين والاوردة والشعيرات الدموية والحاجات اللى بتربط ما بينهم
وبيتكلم عن كل واحد منهم بالتفصيل وشرح الطبقات المكونة ليه
الفصل ده مشكلته حاجة ان كله شبه بعضه يعنى بيلخبط وفيه حاجات كتير بتتنسي بسرعة فلازم وانت بتذاكره تذاكره من الاول من حتة كويسة عشان متتلخبطش وانا لاقيت الكلام ده فورق دكتر حجازى لما قريت الفصل ده منه



بعد كدة بتاخد الجلد skin بتاخد تركيبه بالتفصيل الممل الممل أكتر من ثانوى بكتير وتركيب الشعرة وانواع الغدد العرقية والدهنية وانواع الجلد نفسه لأن فيه منه انواع
عادة الفصل ده من الفصول اللى بتتكروت فالآخر فحاولوا تعتمدوا على نفسكوا فيه اكتر بلاش المحاضرات

بعد كدة خدنا ال lymphatic اللى هو الجهاز اللمفاوى ده بيشرح يعنى ايه ليمف والاماكن اللى بيكتر فيها فاجسم زى الطحال والعقد اللمفاوية والغدة التيموسية عن طريق شرح تركيب كل واحدة منهم

آ خر فصل بتاخدوه و ال respiratory الجهاز التنفسي ده غالبا بتلاقيه اتشرح فالمحاضرات ازاى متعرفش حتى لو انت مواظب على كل المحاضرات مش مشكلة هو طويل شوية بس عاوز يتقري ما يتركنش لقبل الامتحان
أنا لما قريته من ورق دكتر حجازى فهمت منه
كدة خلص المنهج عدوا انتوا بقى كام فصل عشان أنا تعبت

يتبع باذن الله ......

طب نكمل وسورى عالتأخير
ثانيا: توزيعة الدرجات :-
الهستو زى مانتوا عارفين من 150

السنة اللى فات كانت التوزيعة كالآتى :-
امتحنا امتحانين أعمال سنة mcq واحد كان ب5 والتانى ب15 فالاتنين على بعض ب20
بعد كدة فالترم التانى امتحنا امتحان عملى تجربة كدة من 10 درجات
بعد كدة كان امتحان العملى اللى تحت الميكروسكوب من 30 درجة
يبقى لغاية دلوقتى 60 درجة من ال 150
يبقى فاضل 90
دول على امتحان آخر السنة اللى بيتقسم ل 10 شفوى و و 7.5 mcq
زائد اللى فاضل بيبقى على امتحان التحريرى الايسى وفيه 10 درجات منهم عالرسمة


ثالثا : سكاشن العملى :
عملى الهستولوجى هو أسهل عملى طول السنة بيبقى سكشن واحد فالاسبوع وكل مرة بتدرس شكل عينة او اتنين أو تلاتة بيبقوا متواكبين مع اللى انت بتاخده فالمحاضرات
زائد انك بتتعلم كمان ازاى ترسمهم
الامتحان لعملى مبترسمش فيه لكن بيبقى بس سلايدات تحت الميكروسكوب ...الرسم بيبقى فآخر السنة


رابعا : الكتب:-
على حد علمى السنة اللى فاتت كان فيه 4 كتب كتاب د/ ماهر عمارة ود. محمد عصام ودز عادل زهدى ود. ابتهاج
انهى أحسن فيهم ده على حشب محاضراتك وعلى حسب قدرة فهمك من أى كتاب
وفيه كمان ورق د. حجازى كنت فى البداية مش بحبه لأنه مختصر بس بصراحة كنت غلطان لأنه كويس جدا وبيلم فى الآخر
انت ممكن فى الهستو متعتمدش على كتاب واحد ممكن كل جزء فالمنهج تقراه من حتة على حسب فهمك
نصيحة اهتموا بالهستو من البداية عشان بيتركن للآخر وبيبقى بايخ بوخان فظيع
أنا خلصت الى عاوز أقوله ولو فى حاجة تانية افتكرتها كتبها ان شاء الله