مبروك يا فكرة

مبروك ... مبروك ... مبروك
مبروك لأسرة فكرة على المجهود الرائع اللى اتعمل فى القافلة اللى كانت خير تمثيل لطب عين شمس
انا كنت فرد من افراد القافلة
والله العظيم انا ما لاقى كلام اوصف بيه اللى اتعمل فى القافلة دى
بجد انا عن نفسى مش مصدق ان ربنا اختارنى علشان اشارك فى اعظم عمل فى حياتى
احساس جميل اوى لما تحس انك بتعمل الخير من غير ما تستنى اى مقابل
لدرجة ان الناس كانت بتعيط واحنا ماشيين
اللى اتعمل فى القافلة دى ربنا وحده اللى يعلم لو كل الناس هانت نفسها شوية الدنيا هتبقى عاملة ازاى
القافلة كانت مكونة من كذا فريق بيشتغلوا بس علشان ده عبادة لله


اولا قبل كل ده كانت التدريبات على اعلى مستوى
اطباء بيسيبوا من وقتهم كتير علشان بس ميكونش فى معلومة مش عارفها
ربنا يجزيهم كل خير


ثانيا فريق الاشراف ....
كان متمثل فى دكتور (اشرف) استاذ النساء والتوليد بالدمرداش والاب الروحى لينا
وطبعا اخونا الكبير اللى كان شايل الهم علشان بس يوفر لينا الراحة على قد ما يقدر (محمد حسين)
بجد والله محدش يتخيل الراجل ده تعب قد ايه
احنا كنا مفكرين انه ممنوع عنه الراحة او الابتسام
بس اكيد مبدأه الراحة بعد النجاح ليها طعم تانى
انا اكتسبت منه ده
بجد ربنا يجزيه عننا خير


ثالثا فريق الاعداد ....
بجد فريق مفيش بعد كده
سافروا قبلنا علشان يهيئولنا الظروف علشان نشتغل
استحملوا كتير اوى
بس مدام فى سبيل رضا ربنا كله يهون
وللأمانة مفيش ولا واحد منهم اشتكى
بس كلنا كنا حاسين بالمجهود اللى هما بذلوه


رابعا فريق النظام
الناس دى شالوا اللى محدش يقدر يشيلوه الا الرجالة
مجهودهم اكثر من رائع
ولولا الناس دى محدش كان عرف يشتغل ولا يقدر يركز

خامسا فريق الاطباء
ناس فى منتهى الادب والاخلاق
يعرفوك معنى القدوة اللى بحق وحقيقى
ناس سابوا بيوتهم وشغلهم ووقفوا كل مصالحهم بس علشان يسعدوا غيرهم وبدون مقابل
ابدا مش حسسونا ان انا دكتور وانت طالب
على قد ما يقدروا كانوا بيعلمونا
بجد لازم نرفعلهم القبعة

سادسا فريق المعمل
كان متقسم 3 معامل
1 . معمل الblood
بما انى كنت فرد من المعمل ده شوفت نتايج وحاجات مالهاش دعوة بالكلام النظرى اللى احنا بندرسه
الناس لو على كلام الكتب يبقوا خلاص ماتوا
وسبحان الله
الناس مش عارفة انها تعبانة اساسا
وبجد
عايز اشكر قائدالمعمل بتاعنا اللى لولاه والله ما كنا اشتغلنا
طبعا هى ( تامر محمد)
كنا بنعدى ال 150 تست فى اليوم
بجد شكرا يا يارا

وانسان انى كان ومازال وخلاص والله بقى اكتر من اخويا الكبير
هو (عمرو البخارى )
الانسان ده حاجة متتصدقش
التزام ... تركيز ,,, شغل ,,, رجولة ,,, مراعة لربنا فى شغله
ربنا يكرمك يا عمرو
هتبقى دكتور ناجح جدا بأذن الله
ربنا يكرمك
ومعلومة برضه ان عمرو هو السبب بعد ربنا فى طلوع القافلة دى
ربنا يجزيك عننا كلنا خير

وشكر خاص لصديق القافلة كلها
بجد اثر فيا اوى ( محمود البرماوى )
تحس انه من غير ما تتكلم معاه انه انت
كلهم بصراحة ميقدرش الكلام يوفيهم حقهم


2 . معمل الstool
بذلوا مجهود فظيع يعنى كانوا بيعدوا ال80 تست كل يوم
ده معناه انهم كانوا مش بيستريحوا تقريبا
وشكر خاص لقائدة معمل ال stool (محمد عجمى )
البنت دى شعلة نشاط ماشاء الله
ربنا يحميكى يا مى


3 . معمل الurine
برضه ميفرقش كتير عن المعامل التانية المجهود جبار
الشغل نار
مفيش تحليل خرج من هناك من غير مراجعة
شكر خاص ل(محمود شكرى)قائد معمل الurine


سابعا فريق التوعية
اكتر ناس تعبت فى القافلة دى
لكم ان تتخيلوا ..............
احنا فى اطراف الفيوم
الدنيا حر
مفيش ميه
الميه اللى هناك فى الحنفيات فيها رمل
عمالين يلفوا كل يوم من ساعة ما طلعنا
بيستحملوا رخامة الدنيا كلها
وقساوة الظروف
بس علشان يعملوا عملهم على اكمل وجه
ويرضوا ربنا ويسعدوا الناس اللى هناك دى
بس فى شخص واحد لولاه مكنش الفريق ده اشتغل بالطريقه دى
بيخاف من ربنا اوى
بيجمع الناس حواليه بطريقة تعاونية فظيعة
هو اللى اكسب فريقه الروح اللى اشتغلوا بيها دى ( نورهان جابر )

ثامنا فريق الصيدلية
دى الناس اللى ماكانتش بتنام
كلنا نروح
وهما شغالين فى الجرد والتحضير بتاع الادوية
كلهم تعبوا جامد جدا
سامر يقدر يكلمكم عنهم احسن منى
لأنه تشرف بالشغل معاهم
فشكر طبعا لفريق الصيديلية وقائدهم (محمد عبد الرحيم )

مهما تخيلتم
مش هتقدروا توصلوا بتفكيركم لمستوى الناس دى اللى عايشين على بعد ساعتين بس من القاهرة
مش هتقدروا تتخيلوا ان 14 فرد عايشين فى اوضه واحده
من غير حمام
من غير مروحه
من غير تلاجة
من غير تليفزيون
من غير سراير
وعايشين مع البهايم والطيور بتاعتهم
مش هتقدروا تتخيلوا ان الناس دى ماكانتش مصدقة انها بتسلم عليك

بجد احساس تانى
ناس فى منتهى البساطة
ناس بتفرح لما ينادولك ويلاقوك رديت عليهم
بيفرحوا ويجروا لما تقول لحد فيهم انك عطشان وعاوز شويه ميه
مش هتقدر تحسه الا لما تجربه

مش هتحسه الا لما تلاقى ست عجوزة كده بتدعيلك دعوة عمرك ما سمعتها فى حياتك
بس فى مضمونها جبل خير عند ربنا

مش هتحسه الا لما توطى على ايد راجل عجوز كده وتبوسها
او تطبطب على ست عجوزة تعبانة وعايشة لوحدها وتاخدها فى حضنك
وتلاقى الدمعة نزلت من عينينها

الناس كانت بتعيط واحنا ماشيين
الاطفال 7 سنين و5 و 4 سنين
عملولنا هدايا بأيدهم واحنا ماشيين



انا بجد مش لاقى كلام تانى اقوله
شكرا لكل اللى ساهموا فى نجاح القافلة دى ولو بالابتسامة



بجد انا فخور انى كنت فرد من افراد القافلة دى

اسرة جامدة اسرة فكرة











































بس مش أجمد من الفجر

و انا معاك يا متميز

تم النقل لقسم أسرة فكرة .. بعد انشاؤه


______

ومبروك يافكرة

مبروك يافكره




فكره اسره ليها وزنها فى الكليه

والفجر بردو